• İş saatlarımız Həftə içi 10:00 dan 19:00 dək
  • Ünvanımız Ofis: Rixard Zorge 20., Bakı Azərbaycan.

SİZƏ ZƏNG EDƏK

Sizə nə zaman zəng edək?


Əsas səhifə Bloq
Tam yeni Lexus LX 600 və 500d artıq Bakıdadır

Tam yeni Lexus LX 600 və 500D artıq Bakıdadır. Lexus tarixinə iz salmış Lexus-un flaqman modeli müştərilər üçün əlçatandır. Bu nəhəng premium avtomobili öz gözlərinizlə görə bilərsiniz.

Mən isə iki ay əvvəl həm yolsuzluğu həm də VİP biznes mühitini bir arada cəmləşdirən Yeni nəsil Lexus LX modellərini hər cür şəraitdə sınaqdan keçirdim.

Nədən ibarətdir Lexus fəlsəfəsi? Toyota-dan nə ilə fərqlənir?

Tbilisinin mərkəzi prospektində kreativ düşüncəli gürcülərin köhnə nəşriyyatın binasında yaratdıqları prestijli Stamba otelinin otaqlarında vanna «qızıldan» olsa da, sovetsayağı ağ əhənglə suvanmış divarları jurnalistlərə tanış gəlirdi, sanki hər addımda xatırladırdı: xəngələ-xaçapuriyə az güc verin, gəlişinizin məqsədi avtomobil test edib reportaj hazırlamaqdır. Avtomobil də nə avtomobil!..

Əvvəlcə Lexus Europe təmsilçiləri bizim nümayəndəlik üçün yeni avtomobilin təqdimatını keçirdilər, bütün texniki özəlliklərdən xəbər verdilər. Testlərin marşrutu barədə məlumatı eşidəndə anladıq ki, yüngül gəzinti olmayacaq, amma hələ təsəvvür etmirdik ki, qarşıda bizi nələr gözləyir.

Marşruta yollanmazdan qabaq avtomobilin ətrafında dövrə vururam. Əslində eksteryer restaylinq məhsulu kimi də dəyərləndirilə bilər. Ümumi proporsiyalar, kuzovun sərt cizgiləri, yan pəncərələrin forması - bütün bunlar əvvəlki modeldə bəyənilmişdi, məhz buna görə əsaslı dəyişikliyə ehtiyac yox idi. O ki qaldı, hər bir avtomobilin simasını formalaşdıran radiator toruna, indi o qədər nəhəngdir ki, kapota da, bamperə də müdaxilə edir.

Çoxları bu barmaqlığı qum saatı adlandırırlar, şəxsən mən daha çox armudu stəkana bənzədirəm. Qabaq led-optika avtomobilin obrazına zəhmli, eyni zamanda romantik notlar bəxş edir. Gündüz işıqları yanarkən istehsalçının emblemini xatırladan «L» hərfi görünür. Yeri gəlmişkən, bu faralar Lexus-un özəl BladeScan AHS sistemi ilə təhciz edilir. Bu sistemdə işıqlandırma fırlanan güzgülərin vasitəsilə həyata keçirilir.

Avtomobilin arxa hissəsi daha çox yenilənib. Tam fərqli fənərlər, onları birləşdirən diod-işıq zolağı, baqaj qapağı, bamper, hətta nömrə yeri də yenidir. R22 disklərin yapışıqlı dizaynını qeyd etməliyəm.

Eksteryerdən fərqli olaraq, interyer əsaslı surətdə yenilənib, burada əsl inqilab baş verib. Sürücüyə vacib olan məlumatlar rəqəmsal cihazlar paneli və ön şüşəyə proyeksiya vasitəsilə çatdırılır. Mərkəzi konsolun üst tərəfində yerləşən 12.3-düymluk displeydən multimedia sistemlərini, naviqasiyanı, ətrafın panoram görüntüləri idarə etmək və izləmək olur. Onun aşağı hissəsində 7-düymlük ikinci monitor var ki, hərəkət rejimlərini, eləcə də klimat-kontrolu buradan tənzimləyirik.

Salondan danışarkən Lexus brendinin yeni dizayn konsepsiyasının nədən ibarət olduğunu dərhal anlayırsan: funksionallıqla eleqantlığın vəhdəti. Söhbət yeni Lexus «flaqman» modelindən gedirsə, düşünürəm interyerdən uzun danışmağa ehtiyac yoxdur. Motoru işə salıb, yola düzəlməliyik. Yeri gəlmişkən, bu avtomobil öz sahibini barmaq izindən tanıyır və dərhal bütün funksiyaları onun istəyinə uyğun tənzimləyir.

Lexus LX modelinin 4-cü nəsli yolsuzluq şəraitində hərəkət xarakteristikalarını təmin etmək üçün etibarlılıq və davamlılığı ilə seçilən ənənəvi rama konstruksiyasını istehsalçının yeni GA-F platformasına inteqrasiya etmişdir. Platformada daha çox alüminium panellərdən istifadə edildiyindən, azı 200 kq çəki atıb, lakin möhkəmliyi əksinə daha yüksəkdir.

Ümumiyyətlə, avtomobilin hərəkət hissəsində, elektron sistemlərində tətbiq edilmiş yeni texnologiyalar, üstəgəl iki yeni mühərrik və transmissiya qarşında tamamilə başqa avtomobilin olduğundan xəbər verir. Həm də Toyota LC 300-dən daha yüksək keyfiyyətli dəri, ağac və alüminium materiallar ilə işlənmiş dəbdəbəli salon - bütün bunlar gözdən pərdə asmaq deyil.

Məlum oldu ki, biz əsl «premium», əgər dörd yerli VİP komplektasiya qismət olsa, hətta «luxury» avtomobildə səyahətə yollanırıq. Hamımız əmin idik ki, bu cür bahalı-sanballı avtomobili muzeydən-restorana sürüb, VİP-istirahət edəcəyik, “off-road” sınaqları isə süni poliqonda selfi çəkməklə məhdudlaşacaq. Haradan biləydik ki, bu əsl sınaq olacaq, həm də təkcə avtomobillər yox, elə jurnalistlər üçün də… Görməli günlərimiz varmış…

İlk 2 saatlıq şosse yolumuz Azərbaycanla sərhəddə yerləşən David Qareja Monastırı istiqamətindədir. Asfalt yolda komanda yoldaşım Emin Musavi ilə mühərriklərdən danışırıq.  Rəsmi press-relizdə yazılıb ki, «yeni LX yüksək gücə və fırlatma anına malik olan qoşa turbolu 3,5 litr həcmli benzinlə işləyən V6 mühərrikinə malik LX 600 və 3,3-litrlik qoşa turbolu V6 dizel mühərriklə hərəkətə gələn LX 500d kimi versiyalarda satışa çıxarılacaq».

Birinci test günündə mən qəsdən dizel variantı seçmişəm ki, ertəsi gün təəssüf hissləri yaşamayaq. Amma ehtiyac yox imiş. 299 at gücü və 700Hm fırlanma anı yolda yetərli sürətlənmə təmin edir. Ötmə manevrlərini asanca gerçəkləşdiririk. Sanki arxa güzgüdə bu boyda «paraxodun» yaxınlaşdığını görən sürücülər özləri ayaqlarını «qaz» pedalından çəkirlər. Mükəmməl səs izolyasiyası və çeviklik kapotun altında dizelin işlədiyini bizə unutdurur. Çay fasiləsi zamanı kolleqalarım Rəhim Əliyev və Elməddin Muradlı etiraf edirlər ki, yalnız dayanacaqda avtomobilin gövdəsindəki yazını görüb, dizellə gəldiklərini anlayıblar.

Belə çıxır ki, bu sayaq nəhəng avtomobildə silindrlərin sayını 8-dən 6-ya endirərkən, mühəndislər risk etməyib: müasir texnologiyalar yüksək perfomansla qənaətcilliyin vəhdətini tapmağa imkan yaradır. Qeyd etməliyik ki, iti dinamika və qənaətcillyin daha bir səbəbkarı da 10-pilləli avtomat sürətlər qutusudur. O ki qaldı, 415 at güclü benzin mühərrikinə, ertəsi gün həm şosse, həm dağ serpantinləri, həm də qatı yolsuzluqda onun həzzini yaşaya bildik…

Mən «qatı yolsuzluq» dedim? Siz mənə inandınız? Axı kimdir 250 minə maşın alıb, Qubanın Çiçi kəndindən yuxarı meşəyə palçıq yoğurmağa gedən. Göstərin mənə həmin insanı! «Avtomobilin potensial alıcısı kimdir?» mövzusunda qədim Siqnaxi şəhərində «pit-stop» zamanı həmkarım Elgün Xıdırovla mübahisə də etdik.

Soruşur ki, adaptiv amortizatorlar və pnevmo-asqı, aşağı pillələr sırası, oxlararası diferensial bloklaşması, opsiya kimi təklif olunan təkərlərarası differensial bloklaşmaları, yolsuzluqda hərəkətin sürətinə nəzarət edən özəl kruiz-kontrol, təkərlərin altında baş verənlərə tam nəzarət edən Back Underfloor View sistemi, saysız hesabsız elektron köməkçilər - bütün bunları işlətməyən şəxs bu modelə bir ətək pulu niyə versin axı?

Cavandır hələ. Mən isə əminəm ki, VİP komplektasiyalı Lexus LX alan «biznesmeni» transmissiyanı yolsuzluğa kökləyən elektron köməkçilər yox, arxa kreslonun massaj funksiyaları və şəxsi «kinoteatr» daha çox maraqlandırır. Hərəkət rejimlərini isə qoy sürücüsü sınasın, amma asta-asta. Çünki sındırsa, təmir haqqı maaşından tutulacaq. Əlbəttə, zarafat edirəm, bu maşın sınmır.

Hər halda testlərin ikinci günü, suyu çəkilmiş çayın daşlı-qayalı vadisində ürək ağrısı ilə dəf etdiyimiz sıldırım sahillər, dərin su maneələri bunu sübut etdi. Bu heç də süni yaradılmış attraksion deyildi, əsl «jeep-trial» yarışlarına layiq marşrut idi. Bəzən mənə elə gəlirdi ki, avtomobilin bir-iki yox, üç təkəri havadan asılıb. Bir neçə saat davam edən gərginlikdən şəxsən mən yorğunluq hiss etdim, amma Lexus LX yorulmaq bilmədi...

«Lexus tam yeni flaqman yolsuzluq avtomobilini təqdim edir!». Rəsmi reliz bu sözlərlə başlasa da, mən əminəm: həftə-səkkiz, mən-doqquz qrafiki ilə dağlara-daşlara yollanmağı sevən imkanlı şəxslər heç də ucuz olmayan Toyota Land Cruiser 300 almalıdırlar. Klassik lüks sedanların-limuzinlərin xarici  görkəmindən bezmiş, lakin arxa kreslonun komfortundan imtina edə bilməyən VİP-müştəri isə Lexus LX seçəcək. Ancaq maraqlısı odur ki yeni LX həm komfortu həm də offroad özəlliklərini birləşdirən nadir avtomobillər siyahısına daxil oldu.

Həftənin beş günü avtomobil sahibini gəzdirsə də, istirahətə sükan arxasında özü yollana bilər, ailəvi və ya dostlarla. Məhz həmin səyahətlərdə asfaltdan kənara çıxmaq lazım olsa, o zaman çəkinməyəcək, bəlkə də çətin bir maneə dəf edib, alqış da qoparacaq. Amma öz aramızdır, əslində isə bu alqışlara avtomobil layiqdir.

Çünki həmin ekstremal testlərdə əmin olduq, sürücünün işi transmissiyanı və elektron sistemləri konktret yolsuzluq şəraitinə kökləməkdən ibarətdir, bundan sonra təkcə sükandan yapışmaq qalır. Bu sistemlər özü fırlanma anını təkərdən təkərə ötürərək, avtomobili istənilən əsirlikdən qurtarır.

Yuxarıda qeyd etdim ki, onu dağa-daşa ürək ağrısı ilə sürdüm, sığortalanmış test avtomobili olsa da heyifim gəlirdi. Nədənsə oteldəki o qızıl vanna yadıma düşdü. Həmən gün mən duşla kifayətlənmişdim, vannaya girməsəm də, ara-sıra o səmtə baxıb, bu imkana sahib olduğumdan məmnunluq duyurdum, sanki o xalis qızıldan imiş.  Zənnimcə yeni Lexus LX də sahibinin «cipperlik» ambisiyalarını məhz öz potensialı ilə qarşılayacaq. Lap qızıl vanna kimi. 

Yəqin elə budur yeni Lexus LX fəlsəfəsi: prestij, dəbdəbə, komfort, eyni zamanda güc, dinamika və yüksək yolsuzluq potensialı.

Xəbərlər 536